СӨҮЛ, БНСУ — Hyundai Motor Group (Групп) нь Гадаад хэргийн яамны харьяа APEC-ийн Бэлтгэл оффистой санамж бичиг (MoU) байгуулж, ирэх Ази, Номхон далайн эдийн засгийн хамтын ажиллагааны байгууллагын (APEC) Эдийн засгийн удирдагчдын уулзалтад албан ёсны тээврийн хэрэгсэл нийлүүлэхээр боллоо.
Энэхүү уулзалт нь 2025 оны аравдугаар сарын 31-нээс арваннэгдүгээр сарын 1-ний хооронд БНСУ-ын Гёнжү хотод зохион байгуулагдана.
Уулзалтын үеэр нийт 200 орчим тээврийн хэрэгсэл ашиглагдах бөгөөд үүнд Genesis G90 (113 ширхэг), Genesis G80 (74 ширхэг), Universe устөрөгчийн цахилгаан автобус (3 ширхэг) болон мобайл оффис автобус (2 ширхэг) багтжээ. Эдгээр автомашинуудыг зочдын үйлчилгээнд болон арга хэмжээний зохион байгуулалтын ажилд ашиглах юм.
Энэ удаагийн APEC-ийн удирдагчдын уулзалт нь 2005 онд Пусан хотод болсон уулзалтаас хойш 20 жилийн дараа Солонгост дахин зохион байгуулагдаж буйгаараа онцлог. Тус уулзалтад 21 гишүүн орон болон бүс нутгийн удирдагчид, төлөөлөгчид оролцож, “Тогтвортой ирээдүйг бүтээе: Холбогдъё, Инновац хийе, Хамтдаа хөгжье” уриан дор худалдаа, гадаад харилцаа, тогтвортой хөгжлийн асуудлыг хэлэлцэх юм.
“APEC-ийн Эдийн засгийн удирдагчдын уулзалтыг ивээн тэтгэх нь Hyundai Motor Group-ийн хувьд нэр төрийн хэрэг юм. Ялангуяа энэ арга хэмжээ 20 жилийн дараа эх оронд маань дахин болох гэж байгаад баяртай байна. Бид уулзалтыг амжилттай зохион байгуулахад бүх хүчээ дайчлан ажиллах болно”
хэмээн Hyundai Motor Group-ийн Глобал бодлогын газрын гүйцэтгэх дэд ерөнхийлөгч Ким Ильбум онцоллоо.
Групп нь энэхүү арга хэмжээний үеэр Genesis брэндийн дээд зэрэглэлийн загварууд болон дэвшилтэт тээврийн шийдлүүдээ — тухайлбал устөрөгчийн цахилгаан автобус, ухаалаг жолоодлогын технологи зэрэг — танилцуулснаар Солонгосын автомашин үйлдвэрлэлийн чанар, инновац, технологийн давуу талыг дэлхийд харуулах зорилготой байна.
Hyundai Motor Group нь өмнө нь ч олон улсын нэр хүндтэй арга хэмжээнд албан ёсны тээврийн хэрэгсэл нийлүүлж байсан туршлагатай. Үүнд:
2024 оны Солонгос–Африкийн дээд хэмжээний уулзалт (Сөүл)
2023 оны G20 Нью Дели дээд хэмжээний уулзалт
2023 оны ASEAN дээд хэмжээний уулзалт (Жакарта)
2022 оны G20 Бали дээд хэмжээний уулзалт зэрэг ордог.
Мөн энэ онд болсон APEC-ийн сайд нарын түвшний хэд хэдэн уулзалтад Групп албан ёсны тээврийн хэрэгслээр ханган ажилласан байна
