Hyundai Motor Group нь цахилгаан автомашины хөгжлийг хурдацтай урагшлуулж, дэлхийн зах зээлд тэргүүлэх зорилт тавин ажиллаж байна. Энэ амжилтын үндэс нь Өмнөд Солонгосын Хвасон хотод байрлах Namyang R&D Center бөгөөд тус төв нь автомашины анхны санаа, загварчлалаас эхлээд инженерчлэл, туршилт, баталгаажуулалт хүртэл бүх үе шатыг нэг дор гүйцэтгэдэг судалгаа, хөгжүүлэлтийн хамгийн том бааз юм.
1996 онд байгуулагдсан энэхүү төв нь суудлын болон ачааны автомашин, цаашлаад ирээдүйн хөдөлгөөнт технологийн платформуудыг хөгжүүлэхэд стратегийн чухал үүрэгтэй. Энд автомашин бүрийг хэрэглэгчийн хэрэгцээнд тулгуурлан боловсруулж, чанар, найдвартай байдал, удаан эдэлгээг (QDR) хангахыг зорьдог.
Тус төвд Hyundai IONIQ 5, Hyundai IONIQ 6, Kia EV9, Kia EV3 зэрэг дэлхийд нэр хүндтэй, шагнал хүртсэн цахилгаан автомашинуудыг бүтээсэн бөгөөд эдгээр нь 2022–2025 онд “Дэлхийн шилдэг автомашин” шагналыг дараалан хүртсэн амжилтыг үзүүлжээ. Сүүлийн жилүүдэд Namyang төвд боловсруулагдсан автомашинууд нийт 12 удаагийн Дэлхийн Автомашины шагнал хүртсэн нь тус төвийн инженерчлэлийн өндөр түвшинг илтгэнэ.
Мөн тус төвд цахилгаан автомашины үр ашиг, явах зайг нэмэгдүүлэхэд чухал нөлөөтэй агаарын урсгалын туршилтын иж бүрэн байгууламж ажилладаг. Ойролцоогоор 6,000 м² талбай бүхий энэхүү лаборатори нь 3,400 морины хүчтэй салхины хонгилтой бөгөөд 200 км/цаг хүртэлх хурдтай агаарын урсгалыг дуурайлган турших чадвартай. Дуу чимээг багасгах зорилгоор карбон материалтай сэнс ашигласан бөгөөд 100 км/цаг хурдтай үед ердөө 54 дБ дуу гаргадаг. Мөн замын бодит нөхцөлийг дуурайлгахын тулд хөдөлгөөнт туузан систем ашигладаг байна.
Энд автомашины агаарын эсэргүүцэл, өргөлтийн хүчийг нарийвчлан хэмжихээс гадна арын хэсгийн агаарын урсгал буюу wake flow-г оновчлох судалгааг хийдэг. Ингэснээр автомашины араас үүсэх турбуленцийг багасгаж, эрчим хүчний хэрэглээг бууруулан, зай хураагуурын үр ашгийг нэмэгдүүлдэг.
Үүнээс гадна Hyundai-ийн “Aero Challenge Car” нэртэй туршилтын автомашин нь ирээдүйн аэродинамик технологийн чиг хандлагыг тодорхойлж байна. Тус загвар нь 0.144Cd гэсэн маш бага агаарын эсэргүүцлийн коэффициентод хүрсэн бөгөөд дараах дэвшилтэт шийдлүүдийг агуулжээ. Үүнд, урд шил ба кузовын завсрыг хааж агаарын даралтыг багасгах Active Cowl Cover, хурд болон горимоос хамаарч ажиллах Active Rear Spoiler, хажуугийн урсгалыг тогтворжуулах Active Side Blade, арын доод хэсгийн урсгалыг хянах Active Rear Diffuser, мөн доод хэсгийг бүхэлд нь бүрхсэн 3D Integrated Undercover зэрэг технологиуд орно.
Эдгээр технологиуд одоогоор туршилтын шатандаа байгаа ч цаашид үйлдвэрлэлд нэвтрэх боломжтой бөгөөд цахилгаан автомашины явах зай, тогтвортой байдал, хэрэглэгчийн тав тухыг илүү сайжруулахад чиглэж байна.
Ийнхүү Hyundai Motor Group нь дэвшилтэт судалгаа, инновацад тулгуурлан цахилгаан автомашины хөгжлийг шинэ шатанд гаргаж, дэлхийн автомашины салбарын ирээдүйг тодорхойлсоор байна.
